愛嘅反面唔係恨，而係冷漠。恨，仍然包含住你同對方過去有嘅經歷同情緒；冷漠，代表一切無情嘅斷絕。
非常年輕時候嘅我覺得愛嘅反面係恨。分手之後立即要同全世界訴苦，話俾朋友聽我有幾傷心有幾痛恨佢。坦白講，啱啱分手嘅時候大家都為情所傷，有邊一個唔嬲有邊一個唔會有一點點想報復嘅念頭呢？我一直以為恨一個人係解脫，長大之後先發現原來恨只不過係一個過程，呢種歒意嘅情緒根本就唔能夠令你擺脫過去走出陰暗。口口聲聲話已經唔在意嘅人其實就仲係好介意，假若你真係已經完全放低，就唔應該有所謂嘅口口聲聲。
二十三歲嗰年我同一個男仔拍咗拖兩個月之後有一日佢突然失蹤，打俾佢唔聽message佢又唔應完完全全將我喺佢嘅世界exclude咗。開頭我擔心佢有事，所以四處打探佢朋友口風。後來先知道佢仍然日日相安無事咁返工放工。喺個一刻我就知道佢好狠心亦都好不負責任咁表示左唔想再同我繼續落去嘅結果。連交代或者一個解釋都無就已經將我排擠於外。嗰次係我第一回體會到原來傷心可以有幾痛，有好幾次我個心痛到令我四肢捲曲連落床嘅氣力都無，我估呢種大概就係真正嘅肝腸寸斷。原來對一個曾經愛上過嘅人冷漠，係一段關係之中其中一樣最大殺傷力嘅復仇武器。
恨一個人只會不斷侵食自己心靈。與其你執着住點解佢要對你咁賤咁衰、點解最後會變成咁，不如將過去放低佢leave it behind啦。佢已經唔愛你之餘仲可能準備好同下個人一齊，你自己仲唔move on自己喺度唔甘心你話幾無謂呢!? 既然分左手就唔好再諗番佢以前對你有幾好，又或者覺得將來搵唔番一個咁嘅人。過左去就唔好再諗；將來嘅野就將來先算啦！人有陣時往往都唔能夠放低以前嘅感情，有時候並唔係因為過去嘅經歷有幾咁刻骨銘心，而比較多係我哋自己本身嘅依戀同執着。
假若你而家呢一刻心裏面仍然有一個好憎恨嘅人，我衷心希望你能夠快啲放低佢。Unfollow佢Facebook又好delete哂之前嘅 what'sapp 都好，唔好再因為聽到佢嘅消息而牽動自己嘅情緒，唔好再因為聽到佢個名就心生波瀾。唔再恨一個人唔代表你放過佢，而係放過自己。
話説有一句英文嘅quotes 我一直都好鐘意 想譯成中文同大家分享，不過自己文釆唔夠好所以搵Wong Wing Lung 幫忙。雖然對我嚟講都太過深奧，不過佢寫得好好。希望大家睇完有畫面，共勉之。
我一直期待著
任你肆意闖進心房 卻再也不會蕩漾
我相信 那天終究會來
我一直期待著
再見⋯卻形同陌路的一絲平淡
Search